Ақмола облысының Қорғалжын ауданында 5 сәуір күні түстен кейін «Шөптікөл» бөгеті бұзылып, маңайдағы елді мекен мен автожолды су басу қаупі туындады, -деп хабарлайды «Dalamedia» ақпараттық порталы.

Гидротехникалық нысан Сабынды ауылынан небәрі 2 шақырым солтүстікте орналасқан. Қазір оқиға орнында тасқын суды қауіпсіз арнаға бұру жұмыстары жүріп жатыр. Төтенше жағдайлар министрлігі, жергілікті әкімдік, полиция және жол қызметтері жұмыла әрекет етуде.

Ресми мәліметке сүйенсек, апат салдарын жоюға шамамен 170 адам мен 43 техника тартылған. Мамандар бөгетті бекітіп, инертті материалдар төгіп, судың бағытын өзгертуге күш салуда.

Ал «Қазавтожол» мекемесінің хабарлауынша, бөгеттен аққан су алқап арқылы жайылып, «Астана – Қорғалжын» тасжолының 75-шақырым тұсын кесіп өткен. Алайда су деңгейі әзірге жолдың жүру бөлігіне жетпеген, қозғалыс тоқтаған жоқ.

Мамандардың айтуынша, аталған учаскеде үш көзді су өткізу құбыры бар, бұл жағдай тасқын суды өткізуге мүмкіндік беріп отыр. Жол жамылғысы бүлінбеген.

Бөгеттің бұзылғаны туралы ақпарат алдымен әлеуметтік желілерде тарады. Жергілікті тұрғындар түсірген видеолардан су ағысының қатты екені анық байқалады.