Жамбыл облысы Қордай ауданындағы қатты боран салдарынан көліктер жолда қалды. Нақтырақ айтсақ, Қордайдың ескі асуында, автожолдың 170–190 шақырым аралығында жүк көліктері жолда тұрып қалып, қозғалысқа кедергі келтірген.

Оқиға салдарынан автожолдың жүру бөлігі жабылып, көлік қозғалысы шектелген. Төтенше жағдайлар министрлігінің күштері жедел әрекет етіп, қар құрсауында қалған 50 жеңіл және 30 жүк автокөлігін қауіпсіз аймаққа шығарды. Зардап шеккендер жоқ.

Ауа райының күрт нашарлауы мен бірқатар автожолдардың жабылуына байланысты Жамбыл облыстық төтенше жағдайлар департаменті тұрғындарды ақпараттандыру және психологиялық қолдау көрсету мақсатында жедел желі телефондарын іске қосты. Тұрғындарға жолға шығарда ауа райы жағдайын ескеріп, қауіпсіздік талаптарын сақтауға кеңес берілді.