Өскемендегі «Қазцинк» кәсіпорнында болған жарылыс салдарынан екі адам қаза тапты, бес адам түрлі жарақатпен ауруханаға жеткізілді ,-деп хабарлайды «Dalamedia» ақпараттық порталы.

Алдын ала мәліметке сүйенсек, қайғылы жағдай түтін сорғыш құрылғыны тазалау кезінде болған. Компания таратқан ақпаратқа сәйкес, жұмыс барысында жарылыс болып, артынша өрт шыққан. Соның салдарынан ғимараттың кейбір бөліктері ішінара опырылған.

Оқиға орнында екі адам мерт болды. Ал зардап шеккен бес адамға дәрігерлер қажетті медициналық көмек көрсетіп жатыр.

«Қазцинк» компаниясы қаза тапқандардың отбасына, сондай-ақ зардап шеккен қызметкерлерге қолдау көрсетілетінін мәлімдеді.

Қазір оқиғаның нақты неден болғанын анықтау үшін арнайы комиссия құрылған. Сонымен қатар жарылыстың қоршаған ортаға ықпалы да тексеріліп жатыр. Алдын ала дерек бойынша, тек жергілікті аумақта шаң таралған, алайда оның мөлшері белгіленген нормадан аспаған және қауіпті заттар тіркелмеген.

Еске сала кетейік, бұған дейін Өскемендегі зауыт аумағында жарылыс болып, құтқарушылар зардап шеккендерді іздестіріп жатқаны хабарланған еді.