Қоршаған ортаға нормадан тыс эмиссиялар жіберген «Қарашығанақ Петролеум Оперейтинг Б.В.» компаниясының Қазақстандағы филиалына 2 млрд теңгеден астам айыппұл салынды, – деп хабарлайды «Dalamedia» ақпараттық порталы.

Батыс қазақстандық экология департаментінің мәліметінше, 3–16 ақпан аралығында арнайы тексеріс ұйымдастырылған.

Нәтижесінде компанияның 2024 жылы атмосфералық ауаға белгіленген мөлшерден 13,84 тонна артық зиянды зат шығарғаны анықталған. Бұдан бөлек, мекеме рұқсат етілген нормадан тыс сарқынды су төгінділеріне жол берген.

Аталған іс бойынша компания Әкімшілік құқық бұзушылық туралы кодекстің 328-бабының 1 және 2-бөліктері бойынша жауапкершілікке тартылды және 2 млрд 77 млн 749,9 мың теңге айыппұл төлеуге міндеттелді.

Қазіргі таңда айыппұлды өндіріп алу шаралары жүзеге асуда. Сонымен бірге компанияға жауапты мекеме тарапынан арнайы нұсқамалар берілген.