Павлодарда құрамында есірткі заттары бар көкнәр тұқымдарын азық-түлік өнімі ретінде заңсыз сатып келген ұйымдасқан қылмыстық топқа қатысты сот үкімі шықты, ,-деп хабарлайды «Dalamedia» ақпараттық порталы.

Іс материалдарына сәйкес, қылмыстық схеманы З.Ф. Алекперов ұйымдастырған. Тергеу барысында оның жақын туыстары да бұл іске тартылып, өнімді жеткізу, сақтау, буып-түю және сату сияқты міндеттерді бөліп атқарғаны анықталды.

Заңсыз өнімдер еліміздің өзге өңірлерінен логистикалық компаниялар арқылы жеткізіліп, көкнәр тұқымы және дәмдеуіш ретінде нарыққа шығарылып отырған. Тінту кезінде құрамында есірткі заттары бар көкнәрдің ірі партиялары тәркіленді.

Қаржылық мониторинг агенттігінің Павлодар облысы бойынша департаменті жүргізген тергеу барысында қылмыстық жолмен түскен қаражаттың қолма-қол ақша және банк аударымдары арқылы қабылданғаны белгілі болды. Сондай-ақ ұйымдастырушы заңсыз табыс есебінен екі автокөлік сатып алып, оларды үшінші тұлғалардың атына рәсімдегені анықталды.

Сот шешімімен З.Ф. Алекперов пен оның екі сыбайласы кінәлі деп танылып, әрқайсысы 7 жылға бас бостандығынан айырылды. Сонымен қатар, заңсыз табысқа алынған екі автокөлік мемлекет кірісіне тәркіленді. Іс аясында жалпы көлемі 321 келі құрамында есірткі заттары бар көкнәр тұқымы жойылды.