Қазақстандық Sen Sulu косметика брендіне қатысты қоғамда туындаған пікірталастан кейін компания негізін қалаушы Айнұр Қабелдинова жарнамаға ресейлік блогер Валя Карнавалды не себепті тартқанын түсіндірді, ,-деп хабарлайды «Dalamedia» ақпараттық порталы.

Кәсіпкердің айтуынша, брендтің басты мақсаты – тек ішкі нарықта ғана емес, ТМД елдері деңгейінде де бәсекеге қабілетті болу. Сол себепті олар шетелдік аудиторияға жол ашуды көздеген.

«Біз өз болмысымызды жоғалтқымыз келмейді. Керісінше, Қазақстаннан шыққан мықты бренд ретінде танылғанын қалаймыз. Тек ішкі нарықпен шектелмей, ТМД елдерінде де қатар жүруді мақсат еттік. Ал Еуропа нарығына шығу әзірге оңай емес, сондықтан жақын нарықтардан бастадық», – деді ол.

Валя Карнавалды таңдауға қатысты шешім қоғамда сынға ұшыраған болатын. Айнұр Қабелдинова бұл қадамда қателік жіберілгенін де жасырмады.

Оның айтуынша, команда бастапқыда нақты деректер мен көрсеткіштерге сүйеніп шешім қабылдаған. Алайда кейін қоғам реакциясы ескерусіз қалғанын түсінген.

«Біз тек аналитикаға ғана емес, аудиторияның сезімі мен пікіріне де мән беру керегін ұқтық. Алдағы уақытта тек сандарға емес, тұтынушылардың ойына да көбірек көңіл бөлеміз», – деді кәсіпкер.

Еске салайық, бұған дейін Sen Sulu бренді ресейлік блогер Валя Карнавалды амбассадор ретінде таныстырғаннан кейін сынға қалған еді. Бұл шешім әлеуметтік желіде қызу талқыланып, пікір екіге бөлінді.

Бір тарап өткен жылғы даулы жағдайларды алға тартып, мұндай таңдау дұрыс емес екенін айтса, екінші тарап блогерлер мен бренд амбассадорларын таңдауда азаматтыққа емес, кәсіби көрсеткіштерге мән берілуі керек деген пікір білдірді.