BI Group компаниясының негізін қалаушы Айдын Рахымбаев пен жұбайы Анар Рахымбаева өз байлығының жартысынан көбін қайырымдылық мақсаттарға жұмсауға ниетті екенін мәлімдеді. Олар халықаралық The Giving Pledge бастамасына ресми түрде қосылып, өз шешімдерін жария етті, -деп хабарлайды «Dalamedia» ақпараттық порталы.

Аталған бастама әлемдегі ауқатты адамдарды қоғамға пайда әкелетін жобаларға қаржы бағыттауға үндейді. Қатысушылар байлығының кемінде жартысын тірі кезінде немесе мұра ретінде қайырымдылық қорларына аударуға міндеттеме алады.

Рахымбаевтар бұл бастамаға қосылған Орталық Азиядағы алғашқы отбасы болып отыр. Өз хатында кәсіпкер бұл қадамды отбасылық құндылықтарының жалғасы әрі көп жылдық еңбектің нәтижесі екенін атап өткен.

Айдын Рахымбаевтың айтуынша, олардың негізгі басымдығы – Қазақстандағы әлеуметтік жобалар. Қаражаттың бір бөлігі мектептер салуға, балаларды қолдауға, ұлттық құндылықтарды дәріптеуге және ел тарихын насихаттауға бағытталмақ.

Forbes дерегіне сәйкес, 2026 жылы Айдын Рахымбаев Қазақстандағы ең бай адамдар тізімінде тоғызыншы орынға енген. Оның байлығы 1,1 миллиард доллар шамасында бағаланған. Сондай-ақ ол алғаш рет әлемдік миллиардерлер тізіміне қосылып, 3185-орынды иеленді.

The Giving Pledge бастамасы 2010 жылы Билл Гейтс, Мелинда Гейтс және Уоррен Баффет тарапынан құрылған. Жобаның мақсаты – ірі дәулет иелерін қоғамдағы өзекті мәселелерді шешуге қаржы бағыттауға ынталандыру. Бүгінде бастамаға әлемнің 30-ға жуық елінен 250-ге тарта меценат қосылған.