Астанада LRT желісінде жолаушылардың қауіпсіздік талаптарын сақтамауынан уақытша кідірістер тіркелді, ,-деп хабарлайды «Dalamedia» ақпараттық порталы.

City Transportation Systems компаниясының хабарлауынша, кейбір жолаушылар платформадағы апаттық тежегіш батырмасын себепсіз басып, вагон ішіндегі қорғаныш әйнегінің артында орналасқан арнайы түймелерді іске қосқан. Сондай-ақ вагон есіктерін ішінен ашуға әрекет жасау және есіктердің жабылуына әдейі кедергі келтіру фактілері де болған.

Компания өкілдері LRT жүйесінің толық автоматты режимде жұмыс істейтінін атап өтті. Сондықтан мұндай әрекеттер пойыз қозғалысына әсер етіп қана қоймай, жолаушылар қауіпсіздігіне де қатер төндіреді. Осындай жағдайларда пойыз тексеру үшін уақытша тоқтатылып, басқару орталығы жүйені қайта бақылауға алады.

CTS жолаушыларды қоғамдық көлікті пайдалану тәртібін сақтауға шақырды. Компания мәліметінше, желі штаттық режимде жұмысын жалғастырып жатыр. Сонымен қатар әр пойызда төтенше жағдай кезінде есіктерді ашуға жауапты арнайы оператор бар.

Баспасөз қызметінің хабарлауынша, тәртіп бұзушылар станциялар мен вагон ішіндегі бейнебақылау камералары арқылы анықталады. Тіркелген барлық жағдайлар құқық қорғау органдарына жолданып, заң аясында қаралады.