Астанада 20 жастағы Есболған Мұрат Жеңісханұлының туыстары оның Tem Dent стоматологиясында көз жұмғанын мәлімдеді, -деп хабарлайды «Dalamedia» ақпараттық порталы.

Жақындарының айтуынша, 2005 жылы туған жігіт тісін емдету үшін қабылдауға ешқандай шағымсыз барған. Алайда инъекция салмас бұрын оған аллергиялық сынама жасалмаған. Алғашқы екпеден кейін жас жігіттің денесі құрыса бастаған. Соған қарамастан, туыстарының сөзінше, оған тағы бір мәрте дәрі егілген.

Осыдан кейін жігіт есінен танып қалған. Оқиға орнына жедел жәрдем шақырылғанымен, оны аман алып қалу мүмкін болмаған.

Марқұмның жақындары екпені дәрігер емес, тәжірибеден өтіп жүрген студент жасағанын айтады. Олардың сөзінше, сол сәтте жанында медбике болған. Сондай-ақ отбасы болған жағдай туралы ата-анасына бірнеше сағаттан кейін ғана хабарланғанын алға тартып отыр.

Қазір марқұмның туыстары істің толық әрі әділ тергелуін талап етіп, оқиғаның ақ-қарасын анықтауды сұрап отыр.