Алматы маңындағы картон зауытының аумағында ірі өрт тіркелді, -деп хабарлайды «Dalamedia» ақпараттық порталы.

Әлеуметтік желілерде Алматының Наурызбай ауданындағы тұрғын үйлер маңынан қою қара түтін көтерілген сәттің видеолары тарады. Кадрлардан түтіннің алыстан анық көрінгенін байқауға болады.

Төтенше жағдайлар министрлігінің мәліметінше, өрт Алматы облысына қарасты Абай ауылында орналасқан картон зауытының аумағында болған. Нақтырақ айтқанда, зауыт ішіндегі қойма ангарынан өрт шыққан.

Алдын ала ақпарат бойынша, нысан әкімшілігі ішінде адам болмағанын хабарлаған. Оқиға орнына өрт сөндірушілер жедел жетіп, су үздіксіз жеткізілген. Сондай-ақ бірнеше арнайы техника мен су атқыш құралдары жұмылдырылды.

Қабылданған шаралардың нәтижесінде тілсіз жау оқшауланды. Қазір өрттің шығу себебі анықталып жатыр.