Алматы қаласында Достық даңғылында орналасқан “Friendly” кафесінде болған өрт оқиғасына байланысты мекеме иесіне айыппұл салынды. Бұл жағдай әлеуметтік желіде тараған видеоны Төтенше жағдайлар қызметі мониторинг барысында анықтағаннан кейін белгілі болды, — деп хабарлайды «Dalamedia» ақпараттық порталы.

Оқиға 29 сәуір күні түнгі уақытта болған. Дәмханада туған күн тойланып жатқан сәтте залға отшашуы бар шырақ орнатылған торт әкелінген. Сол кезде ұшқындар жанғыш интерьерлік безендіруге тиіп, соның салдарынан өрт шыққан.

Тексеру барысында мекеме тарапынан өрт қауіпсіздігі талаптарының өрескел бұзылғаны анықталды. Атап айтқанда, қоғамдық тамақтану орындарында пиротехникалық бұйымдарды қолдануға қатаң тыйым салынғанымен, бұл талап сақталмаған. Мұндай сәндік материалдар аз ғана ұшқыннан-ақ тез тұтанып кетуі мүмкін екені де ескерілген.

Сонымен қатар өрт басталған сәтте қызметкерлер 101 нөміріне хабар бермей, жалынды өз күшімен сөндіруге әрекеттенгені белгілі болды.

Алматы қалалық Төтенше жағдайлар департаментінің мәліметінше, кәсіпкерге қатысты екі әкімшілік іс қозғалған. Оның бірі – Әкімшілік құқық бұзушылық туралы кодекстің 410-бабы 1-бөлігі (үй-жайда пиротехниканы пайдалану кезінде өрт қауіпсіздігі ережелерін бұзу), екіншісі – «Азаматтық қорғау туралы» заңның 16-бабы (өрт туралы тиісті қызметке хабарламау).

Әрбір құқық бұзушылық бойынша кәсіпкерге 15 айлық есептік көрсеткіш көлемінде, шамамен 65 мың теңге айыппұл салынбақ.

Айта кетейік, бұған дейін де Алматыдағы мейрамханалардың бірінде мерекелік торт пен пиротехника қолдану салдарынан ірі өрттің алдын алу тек сәттілікпен аяқталғаны туралы жағдай тіркелген еді.