Теміртауда қоғамдық көлік жүргізушісі жолаушыға шабуыл жасап, әкімшілік жауапкершілікке тартылды, — деп хабарлайды «Dalamedia» ақпараттық порталы.

Аталмыш оқиға әлеуметтік желіде тараған. Бейнежазбада автобус ішіндегі жанжал таспаланған. Бұған жолаушының көлік ішінде тамақтануы себеп болған. Жүргізуші жолаушыға қоғамдық көліктің асхана емес екенін ескертпек болған. Алайда жауап ала алмаған ол, азаматты автобустан түсіруге тырысқан. Тіпті боқауыз сөз айтқаны да камераға жазылып қалған. Ал жолаушы сабыр сақтап, артық әрекетке бармаған.

Облыстық полиция департаментінің мәліметінше, 20 жастағы жолаушы отырған орнын ретке келтіріп, кейін автобустан өз еркімен түсіп кеткен. Ал жүргізушінің қоғамдық тәртіпке қайшы сөздер айтқаны анықталған.

Құқық қорғаушылар 43 жастағы ер адамның жеке басын анықтап, оған ұсақ бұзақылық дерегі бойынша әкімшілік хаттама толтырған. Іс материалдары сотқа жолданды.