Астанада психикалық денсаулық орталығында фельдшерге шабуыл жасалды,-деп хабарлайды«Dalamedia» ақпарат агенттігі. Оқиға 3 сәуір күні сағат 18:30 шамасында болған.

Фельдшердің айтуынша, қабылдау бөлмесіне шамамен 35–40 жастағы ер адам кіріп, науқасты қарауды сұраған. Алайда нақты кімді әкелгенін айтпаған және өзін таныстырмаған. Кейін арада түсінбеушілік туындап, ер адам агрессия танытқан.

Медқызметкер қауіпсіздік түймесін басуға әрекеттенген сәтте, ер адам оның мойнынан ұстап, тұншықтырып, бетін жұдырықпен ұрған. Осы кезде күзет қызметі келіп, жағдайды тоқтатқан.

Астана полиция департаментінің мәліметінше, Қылмыстық кодекстің 380-3-бабы бойынша қылмыстық іс қозғалған. 47 жастағы ер адам ұсталып, қамауға алу шарасы қарастырылып жатыр.

Еске салайық, бұған дейін Алматыда да жедел жәрдем қызметкерлеріне шабуыл жасалған еді.