АҚШ-тың Огайо штатында тұратын тұрғын дүкен сатушысының қателігі арқасында лотереядан 158,5 мың доллар (шамамен 72,9 миллион теңге) ұтып алды, -деп хабарлайды «Dalamedia» ақпараттық порталы.

Оқиға кезінде ер адам EZPLAY Quick Spot лотереясының бірнеше билетін алу үшін дүкенге кірген. Ол бір долларлық бес билет пен бес долларлық бір билет алуды жоспарлаған. Алайда сатушы қателесіп, оған 10 долларлық билет рәсімдеп берген.

Тұрғын билетті кері қайтармай, оны өзінде қалдыруды жөн көрген. Кейін тексерген кезде дәл сол билет ірі ұтыс әкелгені белгілі болды.

Лотерея ұйымдастырушыларының айтуынша, егер ол бастапқы жоспарлаған билеттерді алған болса, ұтыс сомасы әлдеқайда аз болар еді. Ал сатушының қателігі оған толық джекпотты жеңіп алуға мүмкіндік берген.

Ер адам бұл қаражатты инвестицияға салуды, қарыздарын өтеуді және немерелеріне көмек беруді жоспарлап отыр.