Шерзат Полат ісі бойынша сотталған екі азамат өздеріне шығарылған үкіммен келіспей, толық ақтауды талап етіп, Жоғарғы сотқа кассациялық шағым түсірді, -деп хабарлайды «Dalamedia» ақпараттық порталы.

Бұл туралы адвокат Мейірман Шекеев әлеуметтік желіде мәлімдеді. Оның айтуынша, 15 жылға сотталған Азамат Тоқтаубаев пен 7 жылға бас бостандығынан айырылған Дидар Қалиахметов өздерін толық ақтауды сұрап отыр. Адвокат істің қаралуы жақын уақытта өтетінін айтып, көпшіліктен қолдау білдіруді сұрады.

Еске сала кетейік, қайғылы оқиға 2024 жылғы 4 қазанда Талғар қаласында болған. 16 жастағы Шерзат Полат әкесіне дүкенде көмектесіп жүрген сәтте жанжал шығып, соңы пышақ қолданылған төбелеске ұласқан. Салдарынан жасөспірім ауыр жарақат алып, ауруханаға жетпей көз жұмды. Оның ағасы Нұрқанат Ғайыпбаев та жараланған.

Кейін бұл іс Ішкі істер министрінің жеке бақылауына алынып, сот тоғыз адамды кінәлі деп таныды.

Олардың қатарында түрлі мерзімге сотталғандар бар. Апелляциялық саты үкімді өзгеріссіз қалдырған.

Тергеу барысында белгісіз біреулер марқұмның отбасының үйін өртеп жібергені де белгілі болды.

Ал желтоқсан айында оның ағасының мәйіті табылып, ресми мәлімет бойынша өзіне қол салғаны айтылған.