Үндістанда ресейлік блогер фотосессия үшін пілді қызғылт түске бояғаннан кейін жануар өліп қалған, – деп хабарлайды «Dalamedia» ақпараттық порталы.

Алдын ала мәлімет бойынша, 65 жыл өмір сүрген қарт піл бояудан уланған болуы және түсірілімнен кейінгі күйзеліс салдарынан өлуі мүмкін. Мамандар тіпті «табиғи» бояулардың өзі кей жағдайда жануарға зиян келтіруі ықтимал екенін айтады.

Фотосессияны ресейлік блогер Юлия Бурулева Джайпур қаласында өткізген. Ерекше сәулеті мен қызғылт түсті ғимараттарымен танымал бұл шаһар «Қызғылт қала» аталып кеткен. Түсірілім барысында ол пілді де, үнді моделін де қызғылт түске бояған.

Блогер өз сөзінде жануарға зиян келтірмейтін табиғи бояу қолданғанын айтқан. Алайда жергілікті тұрғындар бұл әрекетті қатаң сынға алып, әлеуметтік желілерде жануарларды әсемдік үшін пайдалануға болмайтынын жазып жатыр.