Oracle компаниясының негізін қалаушы Ларри Эллисон алғаш рет Bloomberg нұсқасы бойынша әлемдегі ең бай адам атанды. Оның байлығы 393 млрд доллар деп бағаланып отыр, бұл көрсеткіш Илон Масктың дәулетінен 8 млрд долларға көп.

Мұндай күрт өсімге Oracle акцияларының бірінші тоқсандық есеп жарияланғаннан кейін 40%-ға жуық қымбаттауы себеп болды. Тек бір тәуліктің ішінде Эллисонның капиталы 101 млрд долларға артты – бұл рейтинг тарихындағы рекордтық көрсеткіш.

81 жастағы Эллисон Oracle-ды 1977 жылы құрған және компания акцияларының 40%-дан астамына иелік етеді.

Oracle – деректер базасын, корпоративтік бағдарламаларды және бұлтты технологияларды әзірлейтін АҚШ-тың әлемдік IT-алыптарының бірі.