Құжатқа сәйкес, Алатау жеке басқару тетіктері қалыптасқан, қаржылық және институционалдық тұрғыдан дербес қала ретінде дамиды. Басқару жүйесінде стратегиялық бағыт пен күнделікті әкімшілік жұмыстар бөлек жүргізіледі. Бұл ретте негізгі үйлестіруді Alatau City Authority атқарады. Аталған құрылым Үкімет құрамына кірмейді, бірақ премьер-министр басқаратын кеңеске есеп береді. Ал мәслихат пен әкімдік қаланың күнделікті тіршілігіне жауапты болып қала береді.

Жаңа заң аясында Алатауды заманауи технологияға негізделген «ақылды қала» ретінде дамыту көзделген. Барлық қызмет мүмкіндігінше цифрлық форматқа көшіріледі.

Қаланың қаржы жүйесі де өзгеше болады. Мұнда арнайы салық тәртібі енгізіліп, сырттан – республикалық не өзге бюджеттен қаржы тартылмайды. Қала тек өз кірісі есебінен дамиды. Сонымен қатар жергілікті бюджет пен мемлекеттік қор қаражаты біріктірілген ортақ бюджет қалыптастырылады.

Инвестиция тартуда жер қоры басты құралға айналмақ. Жер учаскелері нақты жобаларға сай, арнайы келісімдер арқылы беріледі. Бұл тәсіл жерді экономикалық айналымға тиімді енгізуге мүмкіндік береді.

Алатаудың дамуы ұзақ мерзімге жоспарланған. Қалада жалпы стратегиямен қатар 30 жылдық даму жоспары және 15 жылдық құрылыс жоспары қарастырылған.

Сондай-ақ инвесторлардың құқығы қорғалып, оларға тең жағдай жасалатынына кепілдік беріледі. Олар дауларды АХҚО соты немесе халықаралық арбитраж арқылы шешу мүмкіндігіне ие болады.