Алатау қаласында жылдамдығы сағатына 350 шақырымға дейін жететін аэротакси жобасы қолға алынуы ықтимал,-деп хабарлайды «Dalamedia» ақпараттық порталы.

Жоба аясында қалада аэротакси мен квадропорттар желісін дамыту жоспарланып отыр. Бұл бастама жүзеге асса, Алматы агломерациясындағы туристік бағыттарға жыл сайын шамамен 8 миллион адам қатынай алады деген болжам бар.

Вице-премьер Қанат Бозымбаевтың айтуынша, Алатау жаңа технологияларды алғаш енгізетін қалалардың біріне айналуы мүмкін. Соның ішінде дрондар мен аэротаксилерді 120 метрден жоғары биіктікте сынақтан өткізу қарастырылып отыр. Қазір мұндай тәжірибе әлемде тек Қытайдың Шэньчжэнь қаласында ғана бар.

Оның сөзінше, бұл бағытта Қазақстан АҚШ және Қытай компанияларымен келіссөз жүргізіп жатыр. Аталған елдер электрлі аэротакси мен жүк тасымалдайтын дрондар өндірісінде көш бастап келеді.

Жоба шеңберінде арнайы квадропорттар салынып, Алатау, Қонаев, Алматы қалалары мен туристік аймақтар өзара байланыстырылмақ. Соның нәтижесінде әуежайға келген жолаушылар Медеу, тау кластері немесе Қапшағай жағалауына небәрі 10–15 минутта жету мүмкіндігіне ие болады.

Алдын ала мәліметке сәйкес, аэротаксилердің жылдамдығы сағатына 300–350 шақырымды құрайды. Ал алғашқы кезеңде, яғни алдағы 2–3 жыл ішінде Алматы мен облыс аумағында ұшқышсыз әуе көлігі арқылы қатынас ұйымдастырылуы мүмкін.

Үкімет бұл жобаның мүмкіндігі жоғары екенін атап өтіп, оның туризмді дамытуға серпін беретінін алға тартты. Сонымен қатар бұған дейін Alatau City аумағындағы жер телімдерін шетелдік инвесторларға жалға беру мәселесі де көтерілген болатын.