Дубай муниципалитеті толықтай роботтар арқылы салынатын әлемдегі алғашқы тұрғын үй вилласының құрылысына халықаралық конкурс жариялады. Бұл бастама әмірліктің құрылыс саласын цифрландыру және автоматтандыру стратегиясының бір бөлігі, деп хабарлайды Gulf News.

Жобаны 25-тен астам технологиялық компания мен ғылыми ұйым кіретін халықаралық консорциум жүзеге асырады. Оған Zacua Ventures пен Würth Group жетекшілік етеді. Негізгі мақсат — автоматтандырылған құрылысты тәжірибелік деңгейден нақты, ауқымды нарықтық модельге көшіру.

Конкурс Expo City Dubai аумағындағы ConTech Valley Construction инновациялық орталығының ашылуында жарияланды. Бұл орталық құрылыс саласына арналған жаңа материалдар мен технологияларды сынауға бағытталған.

Муниципалитет басшысы Марван Ахмед бин Галита алдыңғы қатарлы құрылыс технологиялары Дубайды тиімді әрі экологиялық тұрақты құрылыс хабына айналдыруда шешуші рөл атқаратынын айтты. Байқау стартаптарға инновацияны коммерцияландыруға мүмкіндік береді.

Сонымен қатар, жарияланған ConTech жаһандық есебіне сәйкес, құрылыс технологияларына инвестиция көлемі 2033 жылға қарай 30 млрд доллардан асады, жылдық өсім — 17,5%.

Дубай «70-70» стратегиясын да іске қосты: 2030 жылға қарай құрылыс процестерінің 70%-ы зауыттық форматқа көшіп, автоматтандыру деңгейі кемінде 70%-ға жетпек.

Айта кетейік, бұған дейін Дубайда ұшқышсыз такси іске қосылғаны хабарланған.