Абай облысында Dala SK Construction компаниясына қатысты тергеу аяқталды. Агенттіктің қаржылық мониторинг департаменті анықтағандай, компания екі жыл бойы рұқсат құжаттарынсыз тұрғын үй кешендерін салып, азаматтардың ақшасын заңсыз тартқан.
Тергеу материалдарына сәйкес, Irtysh Riverside жобасындағы жоспарланған алты мұнараның тек біреуінің қаңқасы ғана тұрғызылған. Пәтерлер төмен бағамен ұсынылып, пайызсыз бөліп төлеу уәдесі арқылы 64 азаматпен жалған келісімдер жасалған. Заңсыз жиналған қаражат 1 млрд теңгеден асқан.
2024 жылдың қазанында компанияға заңсыз құрылыс және рұқсатсыз кәсіпкерлік деректері бойынша әкімшілік жауапкершілік қолданылып, құрылыс тоқтатылған. Дегенмен, басшылық сот шешімін елемей, жарнаманы жалғастырып, жаңа сатып алушыларды тартуға тырысқан.
Залалды өтеу үшін күдіктілердің екі пәтері, он жер телімі және алты көлігіне тыйым салынды. Ұйымдастырушы қамауға алынған.
Айта кетейік, Алматы әкімдігі жақында үлескерлердің қаражатын тартуға рұқсат берілген 28 тұрғын үй жобасының тізімін жариялады.
DALAMEDIA admin
Бүгін, 21:35
Саясат / Әлем