Түркістан облысы бойынша АФМ департаменті медициналық жабдық сатып алу барысында ірі көлемдегі қаржының жымқырылуына қатысты қылмыстық істі тексеріп жатыр. Тергеу мәліметтері бойынша, бюджеттің 115 миллион теңгесі жалған келісімшарттар мен жасанды түрде көтерілген бағалар арқылы иемденілген.

Ведомствоның нұсқасына сәйкес, «Қазығұрт аудандық орталық ауруханасының» бұрынғы бас дәрігері медициналық газбен қамтамасыз ету жүйесін сатып алуды өзі ұйымдастырған. Ол жабдықты бірнеше бөлек позицияға бөліп, түрлі компаниялармен жеке-жеке келісімшарт жасауға жол ашқан. Схеманы іске асыру үшін медициналық бұйымдар саласында тәжірибесі бар танысын тартқан. Ол өзіне бағынышты, туыстары мен таныстарының атына рәсімделген фирмалар арқылы бағасы қымбат коммерциялық ұсыныстар дайындап отырған.

Тергеу көрсеткендей, нақты жабдықты басқа ұйым жеткізгенімен, барлық құжаттар – келісімшарттар мен қабылдау актілері – күдіктілердің бақылауындағы компаниялар арқылы рәсімделген. Ауруханадан түскен қаражат кейін қолма-қол ақшаға айналдырылып, қатысушылар арасында бөлініп отырған.

АФМ мәліметінше, күдікті әйел заңсыз табысқа Астанадан екі бөлмелі пәтер сатып алған. Сот аталған мүлікке арест қойған. Бұрынғы бас дәрігерге кепіл түріндегі бұлтартпау шарасы қолданылса, оның серіктесі үйқамаққа жіберілген.

Қосымша деректер ҚПК-нің 201-бабына сәйкес жарияланбайды.