Жолаушының айтуынша, ол жануарды тасымалдауға қатысты барлық талаптарды орындаған. Соған қарамастан, SCAT әуе компаниясы оны итімен бірге рейстен шығарып жіберген. Әйел бұл жағдайдан кейін 300 мың теңгесінің босқа кеткенін айтып, жануарға арналған тасымалдау торының да зақымданғанын жеткізді.

Осы жағдайға байланысты әуе компаниясы ресми түсініктеме берді. Компания мәліметінше, жолаушының жануарды тасымалдауға өтініші талапқа сай рәсімделген. Алайда әуежай қызметкерлері контейнерді ұшаққа жеткізу кезінде оның белгіленген талаптарға сәйкес келмейтінін анықтаған.

Сол себепті жануарды бортқа қабылдауға рұқсат берілмеген. Компания өкілдері талапқа сай келмейтін контейнерді пайдалану ұшу барысында жануардың өміріне қауіп төндіруі мүмкін екенін атап өтті.