Енді әуе рейсінде құлаққапсыз музыка тыңдап немесе видео көретін жолаушыларға өмір бойы ұшуға тыйым салынуы мүмкін, — деп хабарлайды «Dalamedia» ақпараттық порталы «Daily Mail» басылымына сілтеме жасап.

АҚШ-тағы «United Airlines» әуе компаниясы рейс кезіндегі талапты күшейтті. Әуе компаниясы жолаушыларға арналған тасымалдау шарттарын жаңартып, жеке құрылғылардан шығатын кез келген дыбысты тек құлаққап арқылы тыңдауды міндеттейтін тармақ енгізген. Яғни құлаққапсыз телефон, планшет немесе ноутбуктен музыка қосып, видео көруге болмайды.

Жаңартылған ережеге сәйкес, талапты орындаудан бас тартқан жолаушыға әуе компаниясы қызмет көрсетуден бас тарта алады. Мұндай жағдайда жолаушы ұшақтан түсіріліп, кейін компания рейстеріне билет алу құқығынан да айырылуы мүмкін.

Сарапшы Скотт Киздің (Scott Keyes) айтуынша, бұл шешім АҚШ-тағы өзге әуе компанияларының саясатынан әлдеқайда қатаң. Оның сөзінше, көптеген тасымалдаушылар жолаушыларға құлаққап қолдануды ұсынғанымен, талапты бұзғаны үшін ұшақтан түсіру немесе болашақта ұшуға тыйым салу жазасын қолдана бермейді.

Ал компания өкілдерінің айтуынша, құлаққабын ұмытып кеткен жолаушылар бортсеріктерден тегін құлаққап сұрай алады. Алайда олардың саны шектеулі болуы мүмкін.

Айта кетейік, соңғы жылдары ұшақ ішінде телефоннан немесе планшеттен дыбысты қатты шығарып, видео көретін жолаушыларға қатысты шағымдар көбейген.