Президент Қасым-Жомарт Тоқаев 15 наурызды Конституция күні ретінде атап өтілетінін және жазда Парламент сайлауы өтетінін жариялады, — деп хабарлайды «Dalamedia» ақпараттық порталы.

Мемлекет басшысы «Қазмедиа» орталығында референдум аясындағы үгіт-насихат науқанына белсенді қатысқан жастармен кездесті. Президент бүгінгі күннің тарихи мәні барын айтып, жастарға алғысын жеткізді.

– Бұл күн ел өмірінде мәңгі есте қалады. Енді 15 наурыз – Конституция күні. Бұл — біздің басты құжатымыз. Мен өзге елдердің конституцияларымен салыстыра отырып, біздің Ата заңымыздың ең үздіктер қатарында екеніне сенімдімін, – деді Тоқаев.

Президент жаңа Конституцияның жастарға арналғанын ерекше атап, оған волонтерлік қызмет, ғылым, инновация мен жасанды интеллект ұғымдары енгізілгенін айтты.

– Үгіт-насихат науқаны кең ауқымда жүргізілді. Алдағы уақытта атқарылар жұмыс көп. Жазда Парламент сайлауы өтеді, оны бірлесе өткізгеніміз абзал. Менің ойымша, бұл – жастардың парламенті болуы тиіс, – деді Президент.