Мемлекет басшысы Қасым-Жомарт Тоқаев референдумның жоғары деңгейде, ашық әрі әділ өткенін атап өтті — деп хабарлайды «Dalamedia» ақпараттық порталы.

Президенттің айтуынша, барлық заң талаптары мен демократиялық нормалар қатаң сақталған. Қасым-Жомарт Тоқаев экзит-полл қорытындысымен танысып, ел азаматтарының белсенді қатысуын ерекше бағалады.

– Бүгін – Қазақстан үшін тарихи күн. Халқымыз конституциялық реформаны қолдап, өз таңдауын жасады. Азаматтарымыз Отанның болашағын ойлап дауыс берді. Бұл шешім еліміздің тарихында мәңгі сақталады. Енді жыл сайын 15 наурызды – Конституция күні ретінде атап өтеміз. Себебі халық жаңару мен жаңғыру үшін дауыс берді. Баршаңызды шын жүректен құттықтаймын! – деді Президент.

Мемлекет басшысы дауыс берушілер саны рекордтық деңгейге жеткенін, бұл көптен бері болмаған оқиға екенін атап өтті. – Учаскеге келіп, азаматтық ұстанымын білдірген баршаға алғыс айтамын. Осы арқылы әлемге қазақ қоғамының саяси мәдениеті жоғары екенін паш еттік. «Бірлік бар жерде өркендеу бар», – деді Тоқаев.

Президенттің сөзінше, жаңа Конституция еліміздің темірқазығы, тәуелсіздік пен егемендіктің тірегі.

– Ата заң адам құқығы мен бостандығының кепілі. Біз бір ел болып, Заң мен тәртіп сақталатын, жауапты әрі жасампаз азаматтары бар Әділетті қоғам құру жолында маңызды қадам жасадық. Бүгін ұлт тарихының жаңа парағын аштық. Жастардың белсенділігі де өте жоғары болды, олардың дауысы естілді. Қазақ елінің Тәуелсіздігі мәңгі болсын! Жаңа Конституциямыз құтты болсын! – деді Қасым-Жомарт Тоқаев.