Актер әрі блогер Нұрсұлтан Жақсыгенге қатысты екі қылмыстық іс қозғалды, – деп хабарлайды «Dalamedia» ақпараттық порталы.

Бұл туралы өнер иесінің бұрынғы жұбайы Фариза Алмасқызы әлеуметтік желідегі парақшасында жазды. Оның айтуынша, экс-күйеуінің үстінен екі бап бойынша іс қозғалған.

«Қазіргі таңда Жақсыген Н. қатысты екі қылмыстық іс тіркелді. Олар — ҚР Қылмыстық кодексінің 115-1 және 274-бабы. Адвокатыммен бірге бұл істердің соңына дейін барып, заң алдында нүктесін қоямыз», – деп жазды ол.

Деректерге сүйенсек, Қазақстан Республикасының Қылмыстық кодексінің 115-1-бабы (сталкинг, яғни адамды аңду немесе ізіне түсу) бойынша 50 тәулікке дейін қамау жазасы қарастырылған. Ал Қазақстан Республикасының Қылмыстық кодексінің 274-бабы 2-бөлігі 3-тармағында көрінеу жалған ақпарат тарату үшін бір жылға дейін бас бостандығын шектеу жазасы көзделген.

Қазіргі уақытта құқық қорғау органдары бұл жағдайға қатысты ресми түсініктеме берген жоқ.