Петропавлда 9-сынып оқушысы қатарластарынан 50 мың теңге талап етіп, «мектепке қарулы шабуыл жасаймын» деп қорқытқан, – деп хабарлайды «Dalamedia» ақпараттық порталы КТК телеарнасына сілтеме жасап. Ол дарынды балаларға арналған элиталық лицейде оқитын таныстарына хабарламалар жолдап, шабуылды болдырмау үшін ақша сұраған.

Алайда оқушылар ақша аудармай, мұғалімге хабарлаған. Полиция дереу хабарламаның авторын анықтап, ұстап алған. 15 жастағы жасөспірім бұған дейін де құқық қорғау органдарының назарында болған, ал анасы ата-аналық міндетін дұрыс орындамағаны үшін жауапқа тартылған.

Қазіргі таңда материалдар кәмелетке толмағандардың істері жөніндегі комиссияға жолдануға дайындалып жатыр. Сонымен қатар жасөспірімді девиантты мінез-құлық танытатын балаларға арналған арнайы білім беру ұйымына жіберу мәселесі қаралуда.