Президент Қасым-Жомарт Тоқаев ХХV Қысқы Олимпиада ойындарында тарихи жетістікке жеткен Михаил Шайдоровты ІІ дәрежелі «Барыс» орденімен марапаттады, – деп хабарлайды «Dalamedia» ақпараттық порталы.

Ақордада өткен салтанатты рәсімде Мемлекет басшысы спортшының жеңісі Қазақстан үшін айрықша маңызға ие екенін атап өтті. Олимпиадада алтын медаль жеңіп алған отандасымыз көк Туды Олимп төріне көтеріп, табандылығы мен қажырлы еңбегінің арқасында әлемге танылды.

Президенттің айтуынша, бұл – ел тарихындағы 32 жылдан кейінгі алғашқы алтын медаль әрі мәнерлеп сырғанаудан алынған тұңғыш Олимпиада алтыны. Сондай-ақ бұл жетістік қазақ спортында Денис Теннің жолын жалғастыратын дарынды жастардың бар екенін көрсетті.

Мемлекет басшысы чемпионды дайындауға үлес қосқан мамандардың еңбегін де жоғары бағалады. Спортшының бапкері, жаттықтырушы-кеңесші Алексей Урманов ІІ дәрежелі «Достық» орденімен наградталды.

Кортина д’Ампеццо мұз айдынында жарқыраған Михаил Шайдоровтың жеңісі өзіне деген сенім мен тынымсыз дайындықтың нәтижесі ретінде бағаланды. Оның табысы жас спортшыларға үлгі болып, отандық спорттың мерейін үстем етті.