Шымкентте 8 жасар баланың асқазанынан шаш шықты, – деп хабарлайды «Dalamedia» ақпараттық порталы.

Соңғы аптада құсып, тәбеті нашарлаған жеткіншек іші ауыратынын айтып шағымданған. Әжесінің сөзінше, ол тіпті нәр татпаған.

Дәрігерлер тексеру барысында баланың асқазанынан бөгде затты байқаған. Жеткіншектің өміріне қауіп төнуі мүмкін болғандықтан, шұғыл ота жасалды.

«Ота кезінде баланың асқазанынан бір уыс шаш түйіні алынды. Медицинада бұл жағдай трихобезоар деп аталады, яғни асқазанда шаштың жиналуы», – дейді Шымкент қаласының денсаулық сақтау басқармасы.

Мамандардың айтуынша, мұндай дерт сирек кездеседі. Көбіне балалар мен жасөспірімдерде, сондай-ақ 30 жасқа дейінгі әйелдерде байқалады.

Қазіргі таңда баланың жағдайы тұрақты, ол дәрігерлердің бақылауында.