Семейде жергілікті билік қала тұрғындарын шалғай ауылдарға көшіруге бағытталған арнайы бағдарламаны іске қосты. Жоба аясында ауылға қоныс аударуға ниетті азаматтарға тұрғын үй алуға алғашқы жарна ретінде 1,5 миллион теңгеге дейін қаржы қарастырылған. Сонымен қатар кәсіп бастауға грант беру және жылдық 6 пайызбен 10 жылға дейін жеңілдетілген несие рәсімдеу мүмкіндігі ұсынылады, деп хабарлайды Dalamedıa 24.kz-ке сілтеме жасап.

Бағдарлама шеңберінде қоныс аударушыларды тұрғын үймен, малмен және тұрақты жұмыспен қамту көзделген. Жергілікті әкімдіктердің мәліметінше, мектеп жасындағы балалары бар отбасыларға басымдық беріледі. Сондай-ақ еңбек етуге ниетті азаматтарға жер ресурстары мен шаруашылық жүргізуге қажетті қолдау тетіктері ұсынылатыны айтылды.

Қазіргі таңда Абай облысы аумағында 600 мыңнан астам адам тұрады, оның 222 мыңы ауылдық жерде өмір сүреді. Жоба 2028 жылға дейін жүзеге асырылады. Бастаманың мақсаты – ауыл халқының санын арттыру және ауылдық елді мекендердің әлеуметтік-экономикалық әлеуетін дамыту.