Түркістан облысы Байдібек ауданы білім бөлімінің 18 лауазымды қызметкері бюджет қаражатын иемдену схемасын ұйымдастырғаны үшін сотталды, - деп хабарлайды «Dalamedia» ақпараттық порталы. Тергеуді Қаржы мониторингі департаменті жүргізген.

Тергеу деректеріне сай, ауданның 49 жалпы білім беретін мектебіне арналған жалақы және басқа төлемдер бюджеттік өтінімдер арқылы негізсіз ұлғайтылған. Бухгалтерлер мен экономистер электрондық жүйелерге жалған мәлімет енгізіп, төлем ведомостары мен есеп парақтарына іс жүзінде жұмыс істемеген адамдарды қосқан немесе жалақы мен үстемеақыны артық есептеген.

Құжаттарға заңды сипат беру үшін бұйрықтар, есеп ведомостары мен жұмыс уақыты табельдері сияқты жалған құжаттар жасалған. Кейбір қағаздар төлем жүргізілгеннен кейін кері күнмен рәсімделіп, есептілікті сәйкестендіру үшін түзетілген. Аударылған қаражат жалған тұлғалардың, соның ішінде туыстары мен таныстарының банктік шоттарына түсіп, алдын ала келісілген үлестер бойынша бөлінген.

Салдарынан мемлекетке келтірілген залал 583 млн теңгеден асты. Тергеу барысында күдіктілер шығынның бәрін өтеген.

Сот үкімі бойынша 14 адам 3 жылдан 7 жылға дейін бас бостандығынан айырылды, ал тағы 4 адамға қатысты іс рақымшылыққа байланысты тоқтатылды. Үкім заңды күшіне енді.