Енді шетелдік интернет-дүкендерден тауарға тапсырыс беру тәртібі өзгерді, – деп хабарлайды «DalaMedia» ақпараттық порталы baq.kz сайтына сілтеме жасап.

Бұдан былай халықаралық пошта немесе тасымалдаушылар арқылы жеткізілетін сәлемдемелер «жеке пайдалану үшін» емес, «электрондық сауда тауарлары» санатына жатқызылады. Декларацияны сатып алушы емес, «электрондық сауда операторлары» толтырады. Ал тауарды алу тәртібі өзгермейді. Енді мұндай тауарларды кеденде арнайы декларация арқылы рәсімдеу қажет.

Баж мөлшерлемесі де өзгереді. Құны 200 еуродан асатын тауарлар үшін 5% мөлшерінде баж салынады, ал салмағы 1 килограмнан асса, әр килограмы үшін кемінде 1 еуро төлеу талап етіледі. Бұдан бөлек, 16% қосылған құн салығы да қосылады. 200 еуродан төмен сәлемдемелер бұрынғыдай бажсыз өтеді, ал салмаққа шектеу қойылмайды.

Электрондық сауда операторлары тауарларды жеткізу, сақтау, кедендік рәсімдеуге жауапты болады. Заңнамада олардың құқықтары, міндеттері мен қызметін тоқтату тәртібі нақты көрсетілген.

Жаңа түзетулер Еуразиялық экономикалық одақтың Кеден кодексіне енгізілген өзгерістерге сәйкес іске асады және барлық мүше мемлекеттерде ратификацияланғаннан кейін қолданысқа енеді.