Салықтан жалтарған 850-ге жуық танымал блогерден 500 миллионға жуық қаржы өндірілген. Бұл туралы Қаржы министрлігі мәлімдеді.

Мемлекеттік кірістер комитетінің деректері бойынша, камералық бақылау барысында блогерлердің табысынан салық төлемегені анықталған. Комитет директорының міндетін атқарушы Ерқанат Шыңберген заң бұзушылыққа қарсы шара қолданылғанын айтты.

“2022–2023 жылдарға камералық бақылау жүргізілді. Жалпы 80 мыңға жуық азамат бақылауға түсті, олардың ішінде 850 блогер болды. Бұл блогерлерден 500 миллион теңгеге жуық салық өндірілді. Егер хабарламаны орындамаса, салықтық тексеруге шығуға болады. Тексеру нәтижесінде салық тіпті жеке шотқа енгізіліп, төленуі міндетті. Мұндай мәжбүрлеу шаралары бар, сондай-ақ ӘҚБК-ке сай шаралар қолданылатын болады. Бірінші бұзушылық үшін ескерту беріледі”, – деп түсіндірді ол.

Блогерлердің бартер, сыйлық түрінде алған табыстары салыққа жататынын да атап өтті:

“Табыс тек ақшалай қаражат емес. Белгілі бір мүлік немесе сыйлық та табысқа жатады, сондықтан салық төлеу қажет. Көбіне жарнамаға назар аударамыз, себебі блогерлердің негізгі табысы сол арқылы келеді. Жарнама мақсатында жарияланған жазбалар кәсіпкерлік қызметке жатады”, – деді Ерқанат Шыңберген.

Салық органдары мемлекеттік органдар мен банктердің деректері мен декларацияларды салыстырады. Егер ақпарат сәйкес келмесе, хабарлама жолданады. Хабарламаны орындаудың екі жолы бар: декларацияны түзеп, салық төлеу немесе 30 күн ішінде түсіндірме беріп, дәлел келтіру.