Ерболат Құдайберген наркологиялық орталыққа жатқызылған, бұл туралы полиция хабарлады. Алайда әншінің менеджері мұны жоққа шығарды.

Бұған әлеуметтік желіде тараған видео себеп болған. Бейнежазбада өнер иесі наркологиялық орталықтың маңынан байқалған. Сондай-ақ кадрдың бірінде полиция қызметкерлері ер адамды ұстап жатқаны таспаланған. Тағы бір бейнежазбада азаматтың балағат сөз айтып, ағаш арасынан белгісіз затты іздеп жүргені түсірілген.

Әншінің менеджері бұл ақпараттардың Ерболат Құдайбергенге қатысы жоқ екенін айтады. Ал полиция өкілдері шағым түскенін жеткізді.

«Полицияға көпқабатты тұрғын үйлердің бірінің тұрғындарынан олардың көршісі агрессивті мінез көрсетіп, қоғамдық тәртіпті бұзып жатқаны туралы арыз түсті. Учаскелік инспектор дереу оқиға орнына барды. Ақпарат расталды: ер адам өзін ерсі ұстап, агрессия танытып, айналасындағылардың тыныштығын бұзған», – деп хабарлады полиция.

Медициналық тексеріс ер адамның психоактивті заттарды қолданғанын көрсеткен. Салдарынан 15 тәулікке медициналық мекемеге жолданған.