Тағы бір өңірде мұнай барлау жұмыстары қолға алынбақ. Бұл туралы Өнеркәсіп және құрылыс министрлігінің Геология комитеті төрағасының міндетін атқарушы Қанат Ерубаев мәлімдеді.
Ол Орталық коммуникациялар қызметінде өткен брифинг барысында Қостанай облысының Жангелдин ауданында «мұнай табылды» деген ақпаратқа қатысты сауалға жауап берді.
«Бұл — күрделі жұмыс. Солтүстік Торғай шөгінді алабы өте ауқымды. Шекаралас ел бұл аумақта мұнай мен газ өндіреді. Бізде де осындай қорларды табуға мүмкіндік бар. Сондықтан Қостанай облысы аумағында сейсмикалық барлау жұмыстарын жоспарладық», — деді Қанат Ерубаев.
Жоспарға сәйкес, зерттеу жұмыстары 2026 жылы басталып, үш жыл ішінде аяқталуы тиіс.
Қазір Қазақстанда мұнай негізінен батыс өңірлерде өндіріледі. Ірі кен орындары мен инфрақұрылым Атырау, Маңғыстау, Батыс Қазақстан және Ақтөбе облыстарында шоғырланған. Қызылорда облысында да аз көлемде мұнай өндіріледі.
DALAMEDIA admin
Бүгін, 16:30
Қоғам