Еуропалық футбол қауымдастықтары одағының 51-кезекті конгресі Қазақстанда ұйымдастырылады. Ресми мәліметке сәйкес, алқалы жиын 2027 жылдың 4 наурызында Астана қаласында өтеді.

Конгреске ұйымға мүше 55 ұлттық қауымдастықтың өкілдері қатысады. Жиын барысында олар футболдың дамуына қатысты стратегиялық шешімдерді талқылайды. Аталмыш басқосуда УЕФА президенті сайланып, Атқарушы комитеттің жаңа құрамы бекітілмек.

Еске сала кетейік, 50-конгресс 2026 жылы 12 ақпанда Брюссельде өткен болатын. Ол жиында бірқатар маңызды мәселелер қаралып, шешімдер қабылданған.

Астанада өтетін басқосу Қазақстанда бұрын-соңды болмаған ең ірі халықаралық футбол шарасы болмақ. Конгресті ұйымдастыруға кететін шығынды УЕФА өтейді.

Еске сала кетейік, Қазақстан қауымдастық құрамына 2002 жылдың 25 сәуірінде қабылданған. Осылайша ұлттық құрама Еуропа чемпионатының іріктеу кезеңдеріне қатысу мүмкіндігіне ие болды. Сонымен бірге қазақстандық клубтар Чемпиондар лигасы мен өзге де еурокубоктық жарыстарда өнер көрсету құқығын алды.