Қазақстандық әзілкеш Нұрлан Сабуровқа қатысты жағдайға ҚР Бас прокурорының орынбасары Ғалымжан Қойгелдиев пікір білдірді.

«Біріншіден, шетелдік органдардың шешіміне біз пікір білдіре алмаймыз. Екіншіден, бұқаралық ақпарат құралдарында жазылып жүрген ақпараттың бәрі тексеріліп жатыр. Ол зерттеуді қажет етеді. Ал БАҚ-та айтылып жүрген Қылмыстық кодекстің 170-бабы (Жалдамалылық) Ұлттық қауіпсіздік комитетінің құзыретіне жатады», – деді Бас прокурордың орынбасары.

Еске сала кетейік, Нұрлан Сабуровқа Ресей аумағына 50 жылға кіруге тыйым салынған еді. Бұған дейін БАҚ беттерінде әзілкешке қатысты түрлі ақпарат тараған болатын. Мәселен, оның Ресей азаматтығын алудан бас тартуы, тапқан табысын делдалдар арқылы заңдастыруға әрекет жасауы, сондай-ақ мемлекеттің мәдени құндылықтарын сақтау үшін деген сынды бірқатар себептер айтылды.

Сонымен қатар кей заңгерлер оның қайта оралу жолдарын да топшылаған болатын.