Енді ұшақта отырып, интернетті кеңінен қолдана аласыз. Осы жылы елімізде алғаш рет әуе кеңістігінде интернет қолжетімді болмақ. Бұл туралы Үкіметтің кеңейтілген отырысында Цифрлық даму министрі Жаслан Мәдиев хабарлады.

Мәдиевтің сөзінше, елдегі байланыс инфрақұрылымы қарқынды дамуда. Жуырда бірқатар жобалар толық аяқталмақ. Осылайша, интернет әуеде де қолжетімді болмақ.

«Сонымен қатар 1900 ауыл талшықты-оптикалық байланысқа қосылады. Келер жылы мұндай ауылдардың үлесі 90%-дан асады. Барлық республикалық жол байланыс инфрақұрылымымен қамтылады. Өткен желтоқсанда барлық өткізу бекеті интернетпен қамтамасыз етілді. Алғаш рет азаматтар отандық әуе тасымалдаушының бортында интернетті пайдалана бастайды», – деді Мәдиев.

Айта кетейік, бұған дейін "ҚТЖ" компаниясы да пойыздарға интернет қосатынын жариялаған еді