Қырғызстан аумағына синтетикалық есірткі жеткізбек болған қазақстандық қолға түсті. Бұл туралы 2026 жылғы 10 ақпанда Қырғыз Республикасының Ұлттық қауіпсіздік мемлекеттік комитеті мәлімдеді.

Ведомствоның мәліметінше, арнайы қызмет синтетикалық есірткі тасымалдау әрекетін тоқтатқан. Мамандар Қырғыз Республикасының Қылмыстық кодексінің 282-бабы, 3-бөлігіне сәйкес әрекет еткен.

Қолда бар деректерге сүйенсек, жедел-тергеу шараларының нәтижесінде қазақстандық 8 ақпан күні қолға түскен. Азаматтан салмағы 5 келі болатын «Альфа-PVP» есірткісі табылған.

Қазір күдікті Қырғызстан ҰҚМК-ның уақытша тергеу изоляторына қамауға алынған. Өкілетті органдар істің мән-жайын анықтау үстінде.

Ал Қырғызстандық құзыретті орган өкілдері есірткі құралдарын заңсыз дайындау, сатып алу, сақтау және тасымалдау немесе өндіру фактісі анықталған жағдайда 15 жылға дейінгі бас бостандығынан айыру жазасы көзделгенін, сондай-ақ мүлікті тәркілеу қарастырылғанын жеткізді.