Украина президенті Владимир Зеленский ресейлік зымырандар мен дрондар шығаратын компанияларға қарсы жаңа санкциялар енгізу туралы шешімге қол қойды. Құжатқа сәйкес, аталған қару түрлеріне қажетті компоненттерді жеткізетін фирмалар да шектеулер тізіміне енгізілген.

Сонымен қатар санкциялар Ресейдің қаржы секторына, криптовалюта нарығына және тау-кен өндірісін қамтамасыз ететін бірқатар құрылымдарға да қатысты болмақ. Зеленский бұл шаралар Еуропалық одақтың 20-санкциялық пакетімен үйлестірілгенін атап өтті. Алайда тиісті жарлықтар әзірге ресми түрде жарияланған жоқ.

Президенттің айтуынша, санкция тізімдерін министрліктер мен ведомстволар әзірлеп, ұсыныс енгізеді, ал түпкілікті шешімді Украина Ұлттық қауіпсіздік және қорғаныс кеңесі қабылдайды. Киев өз кезегінде Батыс елдеріне Ресейге қарсы қосымша шектеулер енгізу жөнінде тұрақты түрде ұсыныстар жолдап отыр.