Алаяқтық үшін 10 жылға сотталған Перизат Қайрат жарты жылдан бері жазасын өтеп жатқанымен, әзірге колонияда жұмысқа орналастырылмаған.

Бұған дейін, 2025 жылдың қазан айында ішкі істер министрінің орынбасары Абай Қайырбеков Перизат Қайраттың жұмысқа орналасу мәселесі оның қабілеті мен мекемедегі бос орындарға байланысты шешілетінін айтқан болатын. Осыған байланысты Tengrinews.kz редакциясы Қылмыстық-атқару жүйесі комитетіне (ҚАЖК) ресми сауал жолдаған.

Комитеттің жауабына сәйкес, Перизат Қайрат қазіргі таңда жұмыс істемейді. Себебі, ол отырған мекемеде бос жұмыс орны жоқ.

— Сотталған адам сот үкіміне сәйкес жазасын өтеп жатыр. Қазіргі уақытта мекемеде бос жұмыс орындарының болмауына байланысты жұмысқа тартылмаған, — делінген ресми жауапта.

Сонымен қатар ҚАЖК сотталғандарға түрлі мамандықты меңгеруге мүмкіндік бар екенін мәлімдеді. Колонияларда 48 түрлі кәсіп бойынша оқуға болады. Олардың қатарында аспаз, киім үлгілеуші (модельер), омарташы сияқты мамандықтар бар. Бұдан бөлек, 34 бағыт бойынша қысқамерзімді курстар да қарастырылған.

Комитет өкілдерінің айтуынша, әйел сотталғандар арасында тігінші, шаштараз, визажист, кондитер және пішуші мамандықтарына сұраныс жоғары.

Еске салайық, Перизат Қайрат — қазақстандық қоғам белсендісі әрі кәсіпкер. Ол Biz Birgemiz Qazaqstan 2030 қайырымдылық қорын үш жыл басқарған. 2024 жылдың қарашасында су тасқынынан зардап шеккендерге жиналған 1,5 млрд теңгені жымқырды деген күдікпен ұсталған. Тергеу нұсқасына сәйкес, қаржының бір бөлігі жеке қажеттіліктеріне жұмсалған.

2025 жылдың наурызында аталған қор сот шешімімен таратылды. Ал шілде айында сот Перизат Қайратты орташа қауіпсіздік деңгейіндегі мекемеде 10 жылға бас бостандығынан айырды. Оның анасы Ғайни Алашбаева 7 жылға сотталған.