Қостанай облыстық перинаталдық орталығында үшем дүниеге келді. Бұл — облыста соңғы үш жылдағы тұңғыш жағдай.

Жаңа туған нәрестелердің анасы — 31 жастағы Қостанай ауданының тұрғыны. Бұған дейін отбасы үш ұл тәрбиелеп келген, енді бірден үш қыз дүниеге келді.

Екі қыздың салмағы 2600 грамм, үшіншісі — 2300 грамм. Балалардың бойы 49 сантиметр. Дәрігерлердің хабарлауынша, ана мен балалардың жағдайы қанағаттанарлық.

Еске салсақ, 2025 жылдың қазан айында Қызылорда облысында 23 жастағы әйелге үшем дүниеге келген. Сол айда Түркістан облысында және Шымкентте де үшем туылған, олар дәрігерлердің бақылауынан кейін үйіне шығарылған.