2025 жылы Мемлекет басшысы Қасым-Жомарт Тоқаевтың ішкі және сыртқы саясат бағытындағы қызметі жоғары қарқынмен өтті. Бұл туралы Президенттің көмекшісі – Баспасөз хатшысы Руслан Желдібай мәлімдеді.

Жыл ішінде Президент еліміздің 9 өңіріне жұмыс сапарымен барып, 16 облыс пен республикалық маңызы бар қала әкімдерінің есептерін тыңдаған.

Сонымен қатар Қасым-Жомарт Тоқаев бір жыл ішінде шет мемлекеттерге 23 рет сапар жасады. Оның ішінде Ресей мен Өзбекстанға мемлекеттік сапарлар болды. Қытай Халық Республикасы, Иордания, Түркия, Қырғызстан және Жапонияға 5 ресми сапар ұйымдастырылды. Ал Ресейге (екі рет), АҚШ-қа (екі рет), Түрікменстанға (екі рет), сондай-ақ БАӘ, Өзбекстан, Әзербайжан, Тәжікстан және Қырғызстанға барлығы 16 жұмыс сапары жүзеге асқан.

2025 жылы Қазақстанға шет мемлекеттердің басшылары 30 рет сапармен келді. Олардың қатарында Қытай Халық Республикасы, Италия (екі рет), Грузия, Өзбекстан, Словения, Вьетнам, БАӘ, Руанда, Солтүстік Македония, Болгария, Словакия, Иордания, Конго Демократиялық Республикасы, Мьянма, Мажарстан, Әзербайжан, Финляндия, Эстония, Армения, Түрікменстан, Швейцария және Иран мемлекеттерінің президенттері мен үкімет басшылары бар.

Бұдан бөлек, Мемлекет басшысы жыл ішінде өзге елдердің президенттерімен 43 рет телефон арқылы сөйлескен.

Жалпы, Президент өңірлерге және шет мемлекеттерге жасаған сапарлары барысында 168 960 шақырым жол жүріп, 252 сағат уақытын әуе кемесінде өткізді.