Қазақстан Орталық Азия елдері арасында күтілетін өмір сүру ұзақтығы бойынша көш бастады. Қазіргі таңда елдегі орташа өмір жасы 75,4 жасқа жеткен. 

Дүниежүзілік денсаулық сақтау ұйымының дерегінше, Қазақстан жұқпалы емес аурулардан болатын өлім-жітімді азайту көрсеткіші бойынша алғашқы он елдің қатарына енді. Ал 2025 жылға қарай бұл көрсеткіш төрттен біріне қысқарған. Денсаулық сақтау министрлігі мұны алдын алу шараларының күшеюі, ауруларды ерте анықтау және созылмалы дерттерді тиімді емдеумен байланыстырады.

Сондай-ақ, соңғы жылдары өлім-жітім деңгейі де төмендеген. Жалпы көрсеткіш шамамен 3 пайызға азайса, нәрестелер өлімі 20 пайыздан астам қысқарған. Еліміздегі 18 перинаталдық орталықта жұмыс істейтін «бір күндік емханалардың» қызметін қазірдің өзінде 100 мыңға жуық әйел пайдаланған.

Тиісті министрліктің мәліметінше, перинаталдық скринингтің кеңеюі нәтижесінде ұрықтың туа біткен даму кемістіктерін анықтау деңгейі артқан. Соның есебінен даму ақауларынан болатын нәресте өлімі мен бастапқы мүгедектік көрсеткіштері төмендеген.

Сонымен қатар, ана өлімі де 12 пайызға азайып, тарихи ең төменгі деңгейге жеткен. Мамандардың пікірінше бұл «Аналар саулығы» бағдарламасының нәтижесі .Қазіргі таңда жүктілікке дейінгі медициналық тексеру тәжірибесі кеңейіп, жүктілікке саналы көзқарас артқан.

Халықаралық рейтингтерде де елдің көрсеткіші жақсаруда. Қазақстан БҰҰ Даму бағдарламасының Адами даму индексінде 193 елдің ішінде 60-орынға көтеріліп, бір жылда 7 сатыға жоғарылаған.