Енді қазақстанда банктер қарыз алушының несие қабілетін бағалау кезінде жаңа талапты ескеретін болды. Бұдан былай ірі несие алғанда адамның міндетті әлеуметтік медициналық сақтандыру (МӘМС) бойынша қарызы бар-жоғын тексеру ұсынылады.

Қаржы нарығын реттеу және дамыту агенттігі (ҚНРРА) банктерге қатысты жаңа реттеу жобасын дайындады. Жобаға сәйкес, қарыз алушының несие тарихы мен басқа да міндеттемелерімен бірге МӘМС бойынша қарызы да қарастырылады.

Бұл талап тек ірі несиелерге қатысты: егер бір адамға берілетін несие сомасы банк капиталының 0,01%-дан көп болса (капиталы 100 млрд теңгеден жоғары банктерде) немесе 0,02%-дан көп болса (капиталы 100 млрд теңгеден төмен банктерде).

Мысалы, егер банк капиталы 100 млрд теңгеден сәл асса, МӘМС бойынша қарызы бар адам тек 10 млн теңгеден артық несие алғанда ғана тексеріледі. Бұл ұсынысты Әлеуметтік медициналық сақтандыру қоры енгізген.

ҚНРРА түсіндіргендей, МӘМС бойынша қарыз банктер үшін тәуекел факторын білдіреді. Себебі төлемдерді кешіктіру немесе төлемеу қарыз алушының қаржылық жауапкершілігінің төмен екенін көрсетеді. Сонымен қатар, төлемеу адамның медициналық қызметке қол жеткізе алмауына әкеп соғуы мүмкін.