Ведомство мәліметіне сәйкес, жыл басынан бері жүргізілген зертханалық талдаулардың жалпы саны 2 241 болса, оның 387-сі белгіленген талаптарға сай келмейтіні анықталған. Олқылықтардың басым бөлігі жол-құрылыс материалдарының стандарттан ауытқуымен байланысты екен.

Кемшіліктер анықталған соң, мердігер компаниялар жұмысты өз қаражаты есебінен қайта орындауға міндеттелді. Қайта қалыпқа келтірілген бұзушылықтардың жалпы сомасы 340 млн теңгеден асты.

Филиал директоры Абылайхан Алшынбаевтың айтуынша, орталық тек республикалық маңызы бар жолдарды ғана емес, облыстық, аудандық және қалалық бағыттарды да жүйелі түрде бақылайды.

- Біз жол жабынының жағдайына диагностика жүргізіп, барлық олқылықты хаттамаға енгіземіз. Әрбір мердігерге кемшілікті жою мерзімі белгіленеді. Егер көрсетілген мерзімде жұмыс орындалмаса, тиісті шара қолдану үшін архитектура және қала құрылысы басқармасына хабарлама жібереміз, - деді ол.

Сараптама барысында жиі кездесетін ақаулар:
- тығыздық коэффициентінің талапқа сай келмеуі;
- геометриялық параметрлердің дұрыс болмауы;
- жабын бетінің бұзылуы.

Орталықтың дерегіне сүйенсек, соңғы бес жыл ішінде мердігер ұйымдар анықталған кемшіліктерді жалпы 1,6 млрд теңге көлемінде өз қаражаты есебінен жойған.