АҚШ Қорғаныс министрлігінің жасанды интеллект жүйесі Қытай кемесіндегі жүкті қате анықтап, оны ядролық бағдарламаға арналған компоненттер деп көрсеткен. Соның негізінде америкалық әскерилер кемеге қарсы операция әзірлей бастаған, — деп хабарлайды «Dalamedia» ақпараттық порталы.

CNN мәліметінше, 2026 жылдың көктемінде АҚШ Арнайы операциялар күштері қолбасшылығының сарапшысы Қытай кемесіне қатысты барлау ақпаратын талдау үшін чат-ботты пайдаланған. Жасанды интеллект жүйесі ашық деректерді радиоэлектрондық барлау мәліметтерімен біріктіріп, кемедегі жүк туралы қате қорытынды шығарған.

Кейін сарапшы осы жүйенің көмегімен алынған ақпаратты ресми барлау есебіне айналдырып, тиісті органдарға жолдаған. Осы есептен кейін Пентагон Қытай кемесін тоқтатып, оның бортына қарулы арнайы жасақ түсіру мүмкіндігіне дайындала бастаған. Әскери ұшақтар да әуеге көтерілген.

Алайда операция басталар алдында америкалық шенеуніктер есепті қайта тексерген. Сол кезде құжаттың жасанды интеллект көмегімен әзірленгені анықталған. Кейін чат-боттың кемедегі жүкті қате танығаны белгілі болып, жоспарланған операция тоқтатылған.

CNN кемеде нақты қандай жүк болғанын анықтай алмаған. Сондай-ақ телеарна бұл жағдайда коммерциялық чат-боттың немесе АҚШ үкіметіне арналған арнайы жүйенің қолданылғанын да нақтылай алмады.

Телеарна дереккөздерінің бірінің айтуынша, жасанды интеллект жасаған есеп «соғысты бастап кете жаздаған». Өйткені Қытай кемесіне қарсы АҚШ тарапынан күш қолдану екі ел арасында тікелей қарулы қақтығысқа ұласуы мүмкін еді.