Қорғаныс министірлігінде Қарулы Күштердегі әскери рәсімдер мен дәстүрлерді біріздендіру мәселесі қаралып жатыр. Бұл туралы «Dala Media» ақпараттық порталы хабарлайды.

«Dala Media» редакциясы Қазақстан Республикасының Қорғаныс министрлігіне ресми сауал жолдап, Қарулы Күштерде саптық дайындық барысында орындалатын әскери әндер мен ұрандарға қатысты бірыңғай стандарт немесе ресми регламент бар-жоғын анықтауға тырысты. Сондай-ақ мұндай тәртіп болмаған жағдайда, оны енгізу жоспарда бар-жоғын және әскери бөлімдердегі рәсімдік элементтерді үйлестіру жұмыстары қалай жүргізілетінін нақтылауды сұрады.

Министрліктің жауабында қазір Қазақстан Қарулы Күштерінде қалыптасқан әскери дәстүрлерді жетілдіру және жүйелеу мақсатында жалпы әскери жарғыларға өзгерістер енгізу мәселесі қаралып жатқанын хабарлады.

«Адал азамат – Сарбаз – Отан қорғаушы» бірыңғай тұжырымдамасы, Отан қорғаушының ұтас әрі үйлесімді бейнесін қалыптастыруды көздейді.

Сонымен қатар әскери қызметке шығарып салу, әскери ант қабылдау және мерзімді әскери қызметін аяқтаған сарбаздарды запасқа салтанатты түрде шығару рәсімдерін бірыңғай жүйеге келтіру көзделіп отыр.

Министрлік әскери қызметшілердің моральдық-психологиялық ахуалын жақсарту мен патриоттық рухын көтеруге де назар аударылатынын мәлімдеді. Осы мақсатта Қазақстан Республикасы Мәдениет және ақпарат министрлігімен бірлесіп, демалыс және мереке күндеріне арналған жоспарларға енгізу үшін фильмдер, кітаптар және әскери-патриоттық музыкалық шығармалар тізбесі ұсынылатыны айтылды.

Автор: Нұрбақыт Мұсатиллаұлы