Қазақстанда ымдау тілін ресми қарым-қатынас тілі ретінде тану мәселесі қарастырылып жатыр, деп хабарлайды «Dalamedia» ақпараттық порталы.

Премьер-министр Олжас Бектенов Мәжіліс депутаты Екатерина Смолякова мен оның әріптестерінің депутаттық сауалына берген жауабында бұл бағыттағы жұмыстар жалғасып жатқанын мәлімдеді.

Үкіметтің мәліметінше, аталған мәселе бойынша бірқатар елдің тәжірибесі зерттелген. Олардың қатарында Германия, Ресей, АҚШ, БАӘ, Қытай, Түркия, Болгария, Жапония, Испания, Оңтүстік Корея, Словакия, Португалия, Хорватия, Швеция және Эстония бар.

Жауапта есту және сөйлеу қабілеті бұзылған азаматтарға бүгінде сурдоаударма қызметі көрсетіліп, инклюзивті білім беру мен әлеуметтік қолдау шаралары жүзеге асырылып жатқаны айтылған. Дегенмен 2028 жылға дейін жаңа әлеуметтік бастамаларға қосымша қаржы қарастырылмағандықтан, бұл бағыттағы қызметтерді кеңейту мүмкіндігі шектеулі екені көрсетілген.

Сондай-ақ үкімет өкілдері ымдау тіліне қатысты мәселелер Инклюзивті саясат тұжырымдамасы мен Жасанды интеллектті дамыту тұжырымдамасында қамтылғанын атап өтті.

«Бұл бағыттағы жұмыстар мемлекеттік органдар мен Үкіметтің тұрақты бақылауында», – делінген премьер-министрдің жауабында.

Еске салсақ, өткен айда Мәжіліс депутаты Екатерина Смолякова Үкімет басшысына ымдау тілін заң жүзінде толыққанды қарым-қатынас тілі ретінде тану жөнінде ұсыныс жолдаған болатын. Сонымен қатар депутат сурдоаударма қызметіне белгіленген лимит мәселесін де көтерді.

Қазіргі кезде есту қабілеті бұзылған азаматтарға жылына 60 сағат сурдоаударма қызметі көрсетіледі. Депутаттың пікірінше, бұл көлем ауруханаға қаралу, мемлекеттік қызметтерді пайдалану, білім алу, еңбек ету және қоғамдық өмірге белсенді араласу сияқты күнделікті қажеттіліктер үшін жеткіліксіз.

Кейін Мәжілістің жұмыс тобы депутаттар ұсынған түзетулерді қолдағаны белгілі болды.